!وسع خيالك
عيش كأنك تلعب
Random image
User login
Navigation
Recent comments
- Hmmm !!!
2 hours 1 min ago - Hmmm !!!
2 hours 3 min ago - محمد صبري، عيب
2 hours 8 min ago - ما بعد الحداثة
6 hours 22 min ago - أسطورة
9 hours 2 min ago - اختلف معك
10 hours 58 min ago - أوعي تقولي ان
11 hours 22 min ago - هههههههههههههه
11 hours 56 min ago - سبحانك يا رب ..
12 hours 13 min ago - انت شكلك كنت
13 hours 45 min ago
افرحوا و ابتهجوا... الجزيرة تزرع بعبوص في المدونات
نحب نحن الفشخرة. هذه النحن لا تعود علي الجنس المصري أو الجنس العربي، بل هى صفة مميزة للجنس البشري عموماً. لذا فحينما قام الأخ محمد زين بعمل سبوبة لطيفة في برنامج الجزيرة عن المدونين المصريين، ابتهج جميع الشعب ليس فقط من ظهروا في الفيلم التسجيلي بل أيضاً هؤلاء من شاهدوها وكانوا يمتلكون مدونات. فها هى قناة كبيرة تأتى لتصور معاً وهانحن في التلفاز نتفشخر.
الظهور في التلفاز أزمة حقيقة بالنسبة لي، فما يدفع الأخرين للتسابق، والتدافع لأجل الظهور في الكادر يصبينى بتوتر شديد، ودعنى أكون أكثر صراحة لأقول أن الأمر قد يقترب من البضان مثل تلك الحالة التى تداهمنى لدى دخولى أحدى المولات التجارية، لكن لنعد إلي برنامج الجزيرة مرة ثانية.
البرنامج قدم دعاية كبير للمدونات، وساهم في نشرها بدليل ماسورة الكتابة واللت والعجن التى انفجرت علي الفضاء السيبري في الشهور الأخيرة، فبشكل غير مباشر منحة برنامج الجزير برستيج ونجومية كبيرة للمدونين، ومن الطبيعى أن يظهر الكثيرين الذين يطمحون إلي نفس هذا البرستيج أو للنضال السياسي أو حتى مجرد التعبير عن رأيهم، كل هذا بالطبع جيد.. وكل هذا رآه الرب حسن .
من ناحية أخري أوجدت المدونات مصدر صحفي لكل ومعظم وسائل الإعلام، فإذا حدث اليوم وكان هناك صحفي ما لديه نقص في الأخبار فيمكنه أن يدخل مثلا علي مدونة السيد جثة الميت ويتحدث عن تدوينته في مديح ابومصعب الجزاروي ويكتب خبر عن المدونات المصرية تنعى ابومصعب الجزراوي.
لكن التنافس بين وسائل الإعلام المتعددة وبين المدونات من ناحية، ظل يوفر للمدونات مساحة ما من اللعب بعيدا عن تسخيرها في خدمة أغراض سياسية أو إعلامية. حتى أطلت علينا الجزيرة مؤخراً بقنبلة او بعبوص مخزوق لم تتضح أهدافه بعد.. الجزيرة تقدم لكم "مدونون بلا حدود" برتدون البدلة و الكرافته ويعملون بالأساس مراسلين لدي الجزيرة وحاصلين على دورة في النشر الالكتروني ... هؤلاء هم مدونون الجزيرة وصوت حركة التدوين العربي في الاعلام السنوات القادمه ليفر هؤلاء الذين ظلوا لشهور طويلة يبضنون علينا بدعاوى اتحاد المدونين، ها هو مدونو بلا حدود ة.
طلبة الإعلام المبهورين بالجزيرة و الطامحين حتي ولو في مسح بلاط مقرها تطلقهم الجزيرة على الانترنت بصفتهم مدونين ومراسلين لها في نفس الوقت مع تأسيس مؤسسة لهم، النتيجة الجزيرة صوت مدونو بلا حدود من الباطن، الجزيرة تتحول لحوت ضخم يتكون من قناة إخبارية بالعربية اثنين للرياضة واحدة للأطفال واحد للبث المباشر موقع على الانترنت عملاق وأخرين تسيطر وتخلق إعلامها الشعبي والبديل من خلال خازوقها الوليد الجديد .. مدونو بلا حدود
------------------------------------------------------------------------------ ---
م.س.احجيوج: يتناول نفس الموضوع هناك .............................................................
هو احنا كده يعم أحمد أى حاجه عندنا تبقى فى الأول لمونه ... بعد شويه وركز معايا يا مؤمن ... تلاقيها بطيخه
الكارثه انها لما بتتحول بطيخه ..... بتبقى بطيخه أرعه و طعمها ماسخ
وسلملى على ابطاااااااااااااااااااال الديجيتال
نياااااااااااااااها هو هاااا هااا هى
و أنا اكتب هذا البوست كنت فعلا اعرف ان هذا سيكون ردك
لكن انت قلتها ... ممكن تكون مبادرة كويسة
ممكن؟؟؟!!!؟؟
خلينا عموما نشوف ، بس انا متشائم فبص للكوب من تحت
شوف يا سيد بيسو ، أنا رأيي نلم كل الناس اللي بيرفضوا جمع المدونين في سلّة واحدة و ، يعني هؤلاء الذين يرفضون تحويل المدونات إلى منتديات ، أو تحويل المدونين لسرب سمك يمشي سوا سوا مظاهرة هنا و اعتصام هناك ، أو يرفضون ترشيح أنفسهم لجوائز دويتشه فيلله ، أو يرفضون الظهور في برامج التلفزيون عن المدونين ، أو يرفضون حضور ندوات من عينة "قابل المدونين وجهاً لوجه" ، أو يرفضون حملات على غرار "مدونتي نظيفة جميلة" ، أو يرفضون حضور حفلات المدونين ، أو يرفضون تلبية الـ tags ، أو يرفضون بعض أو كل ما سبق. ناخد الناس دي و نعمل بيهم اتحاد نسميه " مدونون لا منتمون" و نهد المعبد على أصحابه و نقوم بعمليات تخريبية تجاه مدونات الناس التانية دي و نبلغ الحكومة عن أي تجمع لأكثر من خمسة مدونين :)
عموماً هدي أعصابك ، لو حاتكلم بجد بقى.. أنا في الأول كنت باتضايق.. يعني لما أشوف الأستاذ وائل عباس و الأستاذ براء أشرف بيتكلموا في وثائقي الجزيرة عن دور المدونين في المرحلة القادمة كنت باحس بالنقص أو الذنب أن مدونتي ليست نضالية الطابع و أنه ليست لدي النية لتكون كذلك. و بعدين مع مرور الزمن و قراءة تدوينات الناس اكتشفت أن هناك الكثيرون بالفعل ممن يحملون المدونات الكثير.. أو يتوقعون منها الكثير و يعملون على هذا. عشان كده لما لقيت ناس كثيرة جداً بالشكل ده قلت أكيد أنا الغلطان ، و قررت أستمر في مشواري التدويني كمجرد تفريغ لما يأتي على بالي من أشياء بهدف اللت و العجن اللذي يؤدي للراحة النفسية. إذن لن يضايقني ما يفعله المدونون من حولي على الإطلاق من الأشياء التي ذكرتها بالأعلى و التي تقصدها أنت ، و إنما سيضايقني بشدة أن يطالبني أحد بشئ ما أو يحمل مدونتي أكثر مما تحتمل .. و ساعتها سأوجه هذا الغباء بما يليق به.. مثل أحد الأغبياء الذي جاء مؤخراً في تدوينة ما لي و قال لي كلام على غرار " ياريت لو سمحت مواضيع أكثر جدية".. و كأني باكتب باليومية في جريدة أم سيادته !
بس كده ، و المعذرة للإطالة .
إبليس بيه اللي انا فهمته من الموضوع ده وانا شايفه موضوع خطير ومهم وبطيخ وكله وهو اننا لما كنا شلة صيع وقلنا نعمل رابطة او نقابة الناس قالت ليه وفيه ايه وحريتي واللمون والذي منه.....دلوقتي المشكلة المسيحة ان قناة زي الجزيرة بتاعة بروباجندا وزفت جاية بعد الهنا بسنة وراحت جايبلها كام واحد كدة اسمه مدون يا اما مدون ومدقوق ختم وقاللك هيلا بيلا نعمل هليلة وشوية وظهرت مبادرة انشاء اول نقابة تدوين وده معناه ان قناة بتاكل وبتشرب من فلوس امير قطر رضي الله عنه وارضاه لاعن الامريكان علي الهواء مباشرة وباني قواعد حرب الامريكان علي ارضه مباشرة ..هذه القناة بقت عاملة زي البعبع عاوزة تكوش علي كل حاجة باسم الحرية والمهلبية وستك سنية وبالتالي انا شايف انها مش محاولة كويسة ولا نيلة لا دي محاولة سودة وشوية كدة حيطلعوا واحد يسموه نقيب المدونين ويعملله فيديو بلوج علي شاكلة فيديوهات خالك ايمن الظواهري وجدك ايسو بن لادن صلي الله عليه وسلم ...ويقول بقة تصريحات باسم ام المدونين وابوهم وكل اعمامهم وخيلانهم كمان...يعني احتكار ..تدوين موضة ادينا بنعملهالكم ...بصراحة انا شايف انها شئ مقرف ومقزز وعلي اي اساس بينقوا ام المدونين اللي بيقولوا عليهم بلا حدود..لما رحت موقع خالتك الجزيرة يا ابليس وحاولت اسجل نفسي لقيتهم بيقولولوا معلش انت مع الناس التانيين وخلصت علي كدة...بصراحة عاوز اقول كلمة بس انا صايم ويسلم لنا قلمك الهمام يا عم ابليس ...الغريبة انك مش متقيد ولا نيلة مع اننا في رمضان .؟ :)
على فكرة يا بيسو الرابط اللي انت حاطه لحلقة من قناة الجزيرة بتتناول الموضوع، و مكرر نفس الرابط مرتين.. الرابط المباشر للمنظمة العليا للمدونين أهو : http://www.aljazeeratalk.net/node/333
كل ما أشوف حملة من حملات " مدونتي نظيفة جميلة متطورة" أو " " إتحاد المدونين العرب و الأفغان "أو " المدونون للإنتاج السينمائي " بحس كإن فيه مجموعة ناس صحيوا الصبح لقوا مساحة ضخمة من المية في وسط البلد , فكل واحد قعد يغرف منها في كيس و يسميها إسم
مفيش عندي أي مانع من إن أي سبعة مدونين يتجمعوا و يسموا نفسهم عصابة القناع الإسود
لكن الحديث الجماعي عن كون التدوين إتجاه صحافي جديد او مجال إعلامي منفتح ده نوع من التهييس العالي لإن في الأصل عدد المدونات اللي بتقوم بالدور ده و بشكل محترم , مش على طريقة "خالتي سمعت و قالت لي " قليل جدا جدا بالمقارنة بالمدونات الذاتية التي تقوم على أساس من الهرتلة الفردية و الهسس الداخلي و كل ما يتعلق بالإنسان كمخلوق فردي إلى أبعد حد فيما يتعلق بتعبيره عن ذاته
لسه مش فاهم تحديدا إيه دور مودنون بلا حدود , و حيبقى إيه الفرق أصلا بين المدون و المراسل العادي!؟
إلا إذا كانت الجزيرة تقصد إستغلال مساحة على الإنترنت لها جمهورها الخاص
على كل حال
انا عارف إن الصيام تاعبك يا أحمد فهدي أعصابك :))
بصوا يا شباب أول مشكلة أن كلمة تدوين كلمة عبثية، بمعنى أن تدوين ده نشاط مكافئ لارسال رسائل بريدية أو استخدام برنامج محادثة.المدونة أساسا عبارة عن برنامج أو أداة.
لكن لما الجزيرة بتتكلم عن التدوين بتقصد الصحافة الشعبية (اللي ممكن تستخدم أدوات متعددة مش بس المدونات).
و فيه ناس ثانية اللي بيهمها في الموضوع التعبير عن الفردية و مش عارف ايه و ناس ثانية شايفة أن المسألة أبسط من كده بكثير و هكذا، لو طبعا اتفقنا أننا نكون أدق و أكثر وضوحا كانت الدنيا بقيت أحسن بكثير لكن مش بأيدينا الناس دائما بتفشخ المسميات و المصطلحات و في عالم النت المليئ بالهرتلة التسويقية الموضوع أسوأ و أسوأ.
الحل يا بيه أنك تبطل تتعامل على أن مدونة محمود عزت و مدونة الوعي المصري بيجمعهم مشترك أكثر من كونهم من نفس البلد و بيستخدموا تكنولوجيا مشابهة.
اللي حاصل أن عدد المواقع اللي بتستخدم تكنولوجيا مشابهة للمدونات في مصر و العالم العربي محدود و بالتالي لسه بنتكلم عليهم كلهم كظاهرة واحدة.
موضوع الصحافة الشعبية مش هبل و اهتماما الجزيرة بيه ده ذكاء عالي، النهاردة الصحافة الشعبية في مصر محدودة جدا لكن في كوريا الجنوبية الصحافةو الشعبية مسئولة عن رابع أكثر الصحف توزيعا و في ايران و أمريكا و الصين حجم الظاهرة مرعب. أغلب المؤسسات الصحافية القديمة و الجديدة اللي ليها أي وجود على الوب بدأت تجارب لضم الصحافة الشعبية كجزء من شغلها (جارديان و بي بي سي ليهم تجربة متفردة في الموضوع ده).
ده حاجة، فيه ظاهرة ثانية لا تقل أهمية عن الصحافة الشعبية لكن طابعها اقتصادي بيسموها الديل الطويل، الفكرة أن تقنيات النشر الفردي و التصنيف الشعبي و تزايد انتشار الانترنت و سهولة القيام بمعاملات مالية بسيطة على الوب بيسمح بخلق أسواق (مش بالضرورة مبنية على مبادلة السلع بالمال) لا تتركز حول أشهر و أجود و أحسن و باقي صيغة أفعل السلع، يعني وجود منتجين صغار بيسوقوا لجمهور محدود بقى اطار اقتصادي له وزن أكثر من أي حقبة سابقة.
و بالتالي طبيعي أن يحصل اهتمام بتكتل أصوات عديدة على الوب في مقابل التعامل مع كل صوت على حدة أو تجاهل الأصوات المستقلة تماما.
اللي أنا مش فاهمه أنتم مشكلتكم ايه؟ ايه اللي حارقكم؟ ايه الضرر اللي هيعود عليكم من أن الجزيرة تعمل اتحاد مدونين بلا بتنجان؟ و اللي مش فاهمه برضه ليه فيه ناس مستغربة من أن الجزيرة بتعمل اللي بتعمله كل المؤسسات الاعلامية المشابهة؟
أخيرا لا يخفى على حد أن فيه محاولات (عبثية و عبيطة في رأيي) لاستخدام المدونات من قبل مؤسسات سياسية أمريكية (أغلبها تابع للمحافظين الجدد لكن باقي الطيف السياسي الممول جيدا موجود برضه) لاثبات جدوى سياسات بعينها أو للتأثير على الرأي العام أو صناع القرار.
أنا مقتنع أن الموضوع أساسا سبوبة و أن فيه عملاء سي أي ايه و ناس بتوع لوبيهات نصابين بيشتغلوا الأمريكان و يقبضوا فلوس رهيبة على حسنا لكن بغض النظر عن أنا شايف ايه من المتوقع تماما أن حكومات و أجهزة مخابرات محلية و أجهزة اعلامية محلية من مختلف درجات الاستقلال و تكتلات سياسية و مثقفين و غيرهم يحاولوا يعملوا مبادرات للرد أو للتقليل من تأثير المبادرات الأمريكية اياها (و في ظني ده السبب الأساسي لاهتمام الجزيرة بالمدونين من قبل ما بقيت الاعلام في كل العالم يسمع عنهم، و على فكرة الجزيرة طرحت على المدونين المصريين أفكار من نوع مؤتمر تدوين عربي و رابطة و الكلام ده من بدري جدا و الناس مهتمتش).
طيب الكلام ده يخص عمرو عزت في ايه؟ غالبا ولا حاجة عمرة عزت جزء من الديل الطويل زيه زي منال و علاء أو وائل عباس لكن منال و علاء و وائل عباس في جزء من الديل المؤسسات دي مهتمة بيه و عمرو عزت لأ.
طيب بيسو الكلام ده يخصه في ايه؟ف هو حضر المؤتمر بتاع همسة و تلاقي السي أي ايه طلبت منه أنه يحاول هدم جهود الجزيرة عشان يفضل التدوين معقل الخونة المتخاذلين.
أحب أقولك أنك مش متابع أحدث تطورات السي أي ايه فرع المدونات خااااالص، لما أبقى أشوفك بقى
الكلام اللي أنت قلته على الجزيرة سببه الرئيسي هو استخدام لفظة المدونين و التدوين في حين أن المقصود كان حاجة ثانية، دي حاجة مستفزة لكن للأسف بيمارسها الجميع و مع الزمن حتى المعنى التقني هيضيع مع انتشار استخدام أدوات نشر محتوى متقدمة زي دروبال و هتنضم لطابور الكلمات العبثية اللي مبقالهاش أي معنى محدد زي هاكر و مناضل و ارهابي و نشطاء و دعاة و شيوخ و أئمة و خبراء و سياسيين و محدودي الدخل و الحرب الخ
أنت كده عامل زي اللي بيشتكي من الحر كل صيف (و دي حاجة أغلب الناس بتعملها لكن لسه بتسببلي حالة ازبهلال و ده في حد ذاته عامل زي الشكوي من الحر في الصيف :-)
الفكرة أن طالما الموضوع فيه امكانيات للسبوبة و التسويق و الدعاية و الاعلام طبيعي أن الكلمات تشوه خصوصا لما يبقى مربوط بتقنيات جديدة غير مفهومة لأغلب اللي بيتكلموا عنها.
ده أول حاجة، ثانيا أنت بتلوم الجزيرة عشان فيه بني أدم حمار؟ على كده أنت من المقتنعين أن ويكيبيديا متنفعش أبدا و تجديف و هرطقة لأنه لا يمكن الثقة في كلامها مش كده؟
أي مصدر للمعلومات أو الانطباعات لا يمكن الوثوق فيه لازم تراجع أي معلومات أو انطباعات من أكثر من مصدر مش الجزيرة المسئولة عن الانطباع الخاطئ الحمار اللي مش هيشغل دماغه و يدور الأول هو المسئول.
قبل وثائقي الجزيرة كان فيه ناس معندهاش أي فكرة ايه المدونات دي، بعد وثائقي الجزيرة بقى فيه عدد منهم عندهم فكرة تعبر عن فئة واسعة من المدونات و تعبر عن ما يعتبره عشرات الألاف أنه الحاجة المهمة اللي حاصلة بسبب المدونات، مقارنة بصفر من المعرفة بالمدونات دي حاجة عظيمة جدا، لكن أنت بني أدم بضين غالبا أحسنلك يفضل اللي مسمعش مسمعش.
باقي المشكلة أعمق بكثير من المدونات و أظنك سيد لافاهمين، الاعلام التقليدي اللي بينتج ليتم استهلاكه من قبل جماعات ضخمة من البشر أصلا اختراع ضايع و التلفزيون بالذات أسوأ و أسوأ و العملية هنا مش حكر على الجزيرة (بالعكس يا بوب الجزيرة بالنسبة للمشاكل المتفشية في النظام من أوله لأخره تعتبر من أحسن ما يمكن و من غير ما نعمل زي ما بنعمل مع السينما المحلية و ناخد السياق المحلي في الاعتبار).
المسلي أن الأمل الوحيد للفكاك من دين أم المزنق بتاع الاعلام المعلب ده هيظهر عن طريق تجارب الاعلام البديل اللي شغالة اليومين دول و بغض النظر عن أحلامك الرومانسية عن الفردية و الذاتية هتيجي عن طريق تكتلات من النوع اللي بيجيبلك أرتكارية، كعادتة الأغبياء المفيدين أمثالك بتختار تتخانق مع المؤسسة الخناقات اللي في النهاية في صالح الوضع الحالي (يا برجوازي يا متعفن فاضل تقوللي مايكروسوفت منجاتها كويسة) و ده طبعا مش غريب على بتوع المؤامرة الماسونية.
أما بن عبد العزيز و كلامه عن أمير قطر و أمير مصر، غريبة ايه اللي فكرك اليومين دول ما العيال عمالي توالس لأمير أمريكا من قبل ما حد فينا يدون و الاعلام في الدنيا كلها ما عدا الجزيرة (بما فيها ميتين أم الاعلام المحلي المخبول) بيطلعهم ممثلين للمدونين جميعا و أنت عادي يعني و لا ده عشان منعضش اليد اللي بتعمل حاجات؟
في سياق سيتم استغلالي فيه اعلاميا شئت أم أبيت من اللطيف أنه يتنوع المستغلين.
طبعا موضوع الحالة المزاجية ده مفهوم تماما و أتضامن معاك و غير مطالب بتفسير اشمعنى المزاج المرة دي عكر و المرة دي لأ، بتحصل.
"أما بن عبد العزيز و كلامه عن أمير قطر و أمير مصر، غريبة ايه اللي فكرك اليومين دول ما العيال عمالي توالس لأمير أمريكا من قبل ما حد فينا يدون و الاعلام في الدنيا كلها ما عدا الجزيرة (بما فيها ميتين أم الاعلام المحلي المخبول) بيطلعهم ممثلين للمدونين جميعا و أنت عادي يعني و لا ده عشان منعضش اليد اللي بتعمل حاجات؟
"
طب احلف بالله اني مفهمتش قصدك ايه من العبارة دي يا علاء اشرحلي تاني معلش عشان صايم ومخي مقفول..شكرا
"فيه محاولات (عبثية و عبيطة في رأيي) لاستخدام المدونات من قبل مؤسسات سياسية أمريكية (أغلبها تابع للمحافظين الجدد لكن باقي الطيف السياسي الممول جيدا موجود برضه) لاثبات جدوى سياسات بعينها أو للتأثير على الرأي العام أو صناع القرار. أنا مقتنع أن الموضوع أساسا سبوبة و أن فيه عملاء سي أي ايه و ناس بتوع لوبيهات نصابين بيشتغلوا الأمريكان و يقبضوا فلوس رهيبة على حسنا"
دا اسمه شغل قرود و لا مؤاخذة. يعني علشان تفهم يا خواجة: monkey business
حلوة يا ألف !
كلك مفهومية و الله ، أنا شخصياً عبرّت عن رأيي في الموضوع ده من قبل. و لعل بعضنا يذكر كيف كان لأبلة فكيهة كلمتها أيضاً . أيضاً لعل علاء بالذات يذكر كيف حاول هؤلاء تحقيق مزيد من الصعود و الظهور و الإنتشار الإعلامي على قفاه أيام ما كان محبوس . لدرجة إن الموضوع وصل للسي إن إن بجلالة قدرها. و قد عبر عن هذا جزئياً السيد كاف في تدوينته عن بالونة علاء.
أنا بصراحة مش مرتاح للموضوع ده يا علاء
هما يعملوا برنامج عننا وكل حاجة إشطة
لكن قناة الجزيرة تتدخل بثقلها في التدوين فدي حاجة تقلق
لكن عموما احنا مش محتكرين ولا ممتلكين لحق التدوين
بس ما يجيش حد بعد كل اللي عملناه مثلا يقولك الضوابط والمعايير للتدوين
خصوصا وان الجزيرة قناة مش محايدة ولها أجندة كمان
ياخي احه
"يصبينى بتوتر شديد، ودعنى أكون أكثر صراحة لأقول أن الأمر قد يقترب من البضان مثل تلك الحالة التى تداهمنى لدى دخولى أحدى المولات التجاري<!--
يعجبني أنك بتعمل التربيطات العقلية ال أنا بطلت أعبر عنها بصوت عالي!
الى الآن وأنا لا أستوعب فكرة ان يكون هناك اتحاد ما يسمى "مدونون بلا حدود" ولا أعرف كيف تكون طبيعة نشاط اتحاد مثل هذا أعنى أنه لا يرتكز على فكرة موضوعية محددة تسعى لاغراء المتلقى بأفكار محددة لها علاقة بالشأن الانسانى أو غيره هذا يشبه تقريبا انشاء اتحاد يسمى "طباخون بلا حدود" أو "حلاقون بلا حدود" أو "أطباء بلا حدود" أى أنه لا يجوز أن تتحدث باسم فئة معينة وتختص نفسك بالحديث نيابة عنهم الا إذا كنت تعرض فكرة متفردة لا يجوز أن تنسب لأحدا غيرك أو اتحادك المزعوم .. واذا كانت فكرتك خاصة بك وحدك فهذا يستدعى بالضرورة الدخول فى تفاصيل أكثر والحديث باسم معتنقى هذه الفكرة وحدهم وهذا يتطلب أن يكون الأسم أكثر خصوصية كأن تقول "معارضون بلا حدود" أو "موالسون بلا حدود" أو " "مبدعون بلا حدود" أو "متخلفون بلا حدود" وهكذا .... أما هذا الأسم العام فيشبه كثيرا شعار الأخوان المسلمين :الأسلام هو الحل" فضفاض وعام جدا ولا يدخل فى تفاصيل ... المشكلة فى الإدعاء الفاضح بامتلاك التوكيل الحصرى للتدوين والمدونين .. فى حين أنه تقنية مفتوحة لا تخضع للبيع والإمتلاك
أولا بس عشان يبقى كلامي واضح
أنا قلت إن معنديش أي مانع إن أي عدد من المدونين يتجمعوا و يعملوا مدونون من أجل أي حاجة هما عايزينها
ولا حكمت إن اللي بتعلمه الجزيرة ده أخلاقي أو لا أخلاقي
أنا بقول رأيي أو اللي شايف إنه حيحصل من غير إصدار أحكام
الجزيرة بتستغل مساحة جديدة من الجمهور على النت ,أعتقد ده حقها , بس النتيجة عن كده إنها تدريجيا حتحول مراسيليها إلى متحدثين رسميين على شاشتها عن المدونين , بما إنهم أصحاب الدورات المؤسسية و الكورسات المتقدمة اللي بتفرقهم عن المدونين العشوائيين , أطن ده واضح في البيان التأسيسي
الخط الفاصل ده هو اللي حيبقى الفرق
الخط الوهمي ده أصلا بقى اللي خلقه إعتبار التدوين عمل صحفي أو إعلامي بتحتاج فيه لدورات تدريبية عشان تبقى مدون كويس :), يعني يمكن نعتبر شكل المدونات على قناة الجزيرة و كل متابعيها العاديين لسنوات قادمة هي مساحات على النت للتعبير بشكل محدد عن عدة مواضيع محددة تخدم , في رأيي , شكل الجزيرة الإعلامي و الصحافي
و بغض النظر عن كون المتابع للمدونات عامة حيختار الجزيرة أو غيرها أو معياره الشخصي في الحكم على أي شئ
رأيي إن اللي حصل بعد ما الجزيرة سلطت الضوء على التدوين بشكل معين و تحت إطار معين هو إن جحافل من المدونين الجدد قرروا إنهم يفتحوا مدونات عبارة عن أنابيب أخبار و تعليق سياسي و مدونات كوبي و بايست
كل واحد حر في مدونته , أنا برضه مش بصادر حق حد إنه يفتح حتى مدونة فول و طعمية
بس التدوين بالخطوات الواسعة دي بيتحول من أداة زي ما بيقول علاء , إلى أداة ذات غرض ضيق
http://www.aljazeeratalk.net/forum/showthread.php?t=5742
يعني يا علاء إنت إتكلمت عن التدوين كفضاء مفتوح لإستخدام حر , دلوقت كل المحاولات اللي بتحصل حتشده لخطوات في إتجاه تدشين المدونات طريقة خاصة لتعبير عن مواضيع محددة زي ما قلت
ده بقى كويس أو مش كويس , شئ رائع او غير مهم , مش هي دي القضية اأو حاجة بتؤرق الناس اللي بتعتقد إن التدوين شئ ذاتي مثلا أو عنل فردي
لكنه مؤشر في النهاية إن ناس كتير بتستغل الأداة دي بشكل أنا شايف إنه مش شكلها الرئيسي أو بيخدم وجودها العام , إنما لخدمة شكلها الأكثر جاذبية الأيام دي و الأكثر فاعلية للمؤسسات دي
و إبقوا إقروا الأهداف و البحث عن مواثيق عامة للأداء التدويني , و سلام بقى عشان تدويني و اجعني
>بس النتيجة عن كده إنها تدريجيا حتحول مراسيليها إلى متحدثين رسميين >على شاشتها عن المدونين
بغض النظر عن ده هيتحقق ولا لأ ده يفرق فيه ايه؟ مش الحكومة بتنقيلك متحدثين رسميين بأسمك كمصري؟ مش فيه شخصيات عامة (فنانين و رياضيين و كتاب و رجال أعمال و معرفش ايه) طول النهار بيتكلموا بأسمك و نيابة عنك؟ مش فيه رجال دين منذ الأذل بيتكلموا بأسمك؟
أنا فاهم ليه ترفض أن حد يتكلم بأسمك لكن ليه تتعامل مع اضافة واحد ولا اثنين على أنه حدث يستاهل التعليق أصلا؟
ثانيا راجع كلامي الاعلام بقاله سنتين بينقي مدونين يتكلموا نيابة عن المدونين و المصريين و العرب. سؤالي اشمعنى يعني الجزيرة مضايقاكم.
ثانيا قلتلك هما قصدهم الصحافة الشعبية و الصحافة الالكترونية و الصحافة البديلة و كده مش قصدهم المدونين بمعنى من يستخدموا برمجيات النشر و ادارة المحتوى المصنفة على أنها مدونات، و في حالة الصحافة الشعبية يمكن جدا أن يبقى فيه كورسات مفيدة (يعني مثلا ممكن يكون مفيد لوائل عباس أنه يتعلم شوية حاجات زيادة عن التصوير، مفيد لثلاث أربع الصحافيين الشعبيين أنهم يتعلموا حاجات عن التكنولوجيا اللي بيستخدموها و عن قوانين الملكية الفكرية مثلا و هكذا).
>الخط الوهمي ده أصلا بقى اللي خلقه إعتبار التدوين عمل صحفي أو >إعلامي بتحتاج فيه لدورات تدريبية عشان تبقى مدون كويس :)
ثاني هنقول ده مجرد غباء في استخدام اللغة، هما معتبروش كل المدونين بيقوموا بعمل صحافي، اعتبروا أن بعض المدونين بيقوموا بعمل صحافي و هما دول اللي يهموهم (و هما دول اللي يهموا أغلب الناس اللي بتعمل أي حاجة ليها علاقة بالتدوين بما فيهم المبرمجين اللي بيطوروا الأدوات اللي بيستخدمها المدونين).
> يعني يمكن نعتبر شكل المدونات على قناة الجزيرة و كل متابعيها >العاديين لسنوات قادمة هي مساحات على النت للتعبير بشكل محدد عن >عدة مواضيع محددة تخدم , في رأيي , شكل الجزيرة الإعلامي و الصحافي
اه و هي كانت كده من أول يوم اهتمت فيه الجزيرة بالمدونات و هي كده على الجارديان و السي أن أن و البيبيسي و العربية و غيرهم مش فاهم انت عايز ايه بصراحة؟
>بس التدوين بالخطوات الواسعة دي بيتحول من أداة زي ما بيقول >علاء , إلى أداة ذات غرض ضيق
ممكن أفهم أنت ازاي رصدت دي؟ يعني ايه اللي خلاك تقول أن التدوين بيتحول من أداة ممكن استخدامها استخدامات عديدة لأداة بتستخدم استخدام محدود؟ ده بناء على مسح احصائي لكل المدونات و رصد تطورهم قبل و بعد الجزيرة؟
يعني ايه الخطوات اللي بتحصل هتشد التدوين؟ أحنا لو عملنا حملة اسمها الموبايلات المسئولة و بدأنا نشتغل على أن الناس متستخدمش الموبايلات غير في الجد بس و بلاش بقى ميسدات و مسيجات و هبل الموبايل متعملش عشان كده و أبوك اللي بيشقى عشان يدفع فاتورة الموبايل مش جايبهولك عشان تضيع وقتك و كلام من النوع ده هنقدر نشد التموبالين في اتجاه معين؟
هل الجزيرة هتمنعك أنت يا محمود أنك تعمل اللي أنت عايزه بمدونتك؟ هل الجزيرة هتمنع أي حد بيسجل مدونة جديدة أنه يعمل للي هو عايزه؟
الجزيرة هتجتذب ناس كثيرة تدون بطريقتهم؟ يمكن؟ ده ايه المشكلة فيه؟ لو كانت الجزيرة فضلت ساكتة كانت الناس دي هتوصل للمعرفة الكاملة لوحدها و تعمل حاجات ثانمية مختلفة خالص بمدوناتها لكن خلاص الجزيرة لوثت دماغهم مثلا؟
أما اللي بيشتكي من تسمية الاتحاد و بيحلل و ينظر أن ده في حد ذاته مأساة، يا سلام، و هو الاتحاد المصري للكرة ده بيعبر عن كل المصريين اللي بيلعبوا كرة؟ اشمعنى يعني الاتحاد المصري.
ولا بلاش الاتحاد المصري للكورة، تعاونية ربات البيوت دي فيها كل ربات البيوت؟
أنا بقول ترفعوا قضايا عشان يسموها تعاونية بعض ربات البيوت أحيانا.
بطلوا بقى النفسنة اللغوية جاتكم خيبة.
اتحاد المدونين .. لم يسعي الي كسب شهرة
اعترف انها كانت فكرة بيضان .. لكن في البداية وقبل ما يتم حذفها كانت قوية جدا وكنت اعتقد انه لولا حدوث الدسائس لما وصلت الي ما هو الان عارف ان كلامي يعتبر شخ في الودان
لكن دي الحقيقة
اتحاد المدونين مش هيكل منظم وهو اصلا كان من مدونين شغالين في التدوين من زمان
واظن انت عارف السبب بالظبط
لكن وصول هيئة منظمة وهيكل كبير زي الجزيرة الي عالم التدوين هو ما ارفضه بشده
لم ادعي يوما ان مدونة الاتحاد تثمل المدونين
ثم انها ليست الوحيده كمدونة جماعية ... هناك الكثير وكلهم ناجحين ايضا
ارجو ان تفرق بين مدونة ذات توجه ومصلحة .. ومدونة مستقلة معبرة عن فكر اصحابها
عزيزى علاء عبد الفتاح
لا أتخيل أن السى آى أيه اوجماعات المحافظين تحاول السيطرة على حركة التدوين المصرية أو العربية وأستغلالهاوأن هناك جماعات مضادة والتمويل الرهيب كما تذكر, الموضوع تحول فى أتجاه المؤامرة الامبريالية ضد الحركة التدوينية التى تبدو من هذا الوصف كحركة لها ثقلها ,التى ارى أنها محدودة وفردية ولن يكون لها ثقل أو تأثير ألا بعد مرور سنوات طويلة وتحت ظروف مختلفة كثيرة .
لاأفهم السر فى أن الكثير من الناس أصحاب الفكر المميز والجميل بمجرد أن يبدوء فى الحركة الأيجابية ويحصلوا على أعجاب بعض الأشخاص يعتقدوا أنهم مستهدفين وذوى أهمية حتى أن العالم وأجهزة المخابرات تحاول السيطرة عليهم واثناءهم عن الكفاح والتغير , أعلم أن تعليقى قد يكون غير مناسب لك والغريب أننى من الصعب أن أتوقع رد فعلك فقد تناقشنى بموضوعية وقد تبدأ بعبارة مثل: بص يا......أمك ثم تشرح وجهة نظرك مع توضيح بانك لست مناضل وانك شخص غلبان وأن كان هذا لاينفى بالنسبة لى أنك قد تعتقد هذا وقد لاترد بالمرة, وهذا ما يجعل الحوار صعب مع شخص ردود أفعاله صعب التنبأ بها فأنا لا استطيع التحاور أو النقد وفى نفس الوقت أجد من الصعب الصمت وقراءة هذه الأراء بدون التعليق
تحياتى
يا سيد علاء أنت بتقرأ على مزاجك، يا ريت تراجع ردودي، أنا مقلتش أن فيه حد بيحاول يسيطر على حركة التدوين و لا قلت أن حركة التدوين مهمة ولا أصلا اتكلمت عن نفسي.
أنا قلت فيه اهتمام مبالغ فيه بالبحث عن مدونين يتم استخدامهم كدليل على صحة سياسات و مواقف معينة و ذلك لتحريك الرأي العام أو صناع القرار في سكة بعينها و قلت أن في رأيي ده هبل و أنه غالبا نابع عن نصب و سبوبة أساسا.
ثانيا أنا متكلمتش عن التمويل بعينه أنا قلت أن ل الطيف السياسي الأمريكي الممول جيدا بيشارك في لعبة تنقية المدونين دي، و المقصود هنا هو أني أوضح أني أقصد فئة فرعية من الطيف السياسي الأمريكي، يعني التروتسكيين الأمريكان مبيمارسوش اللعبة و مفيش علاقة ما مباشرة ما بين ده و مابين التمويل غير انطباعي أن الموضوع أصلا سبوبة (عموما يمكن اختيار الكلمة كان غير موفق).
السي أي ايه هنا مستخدمة ككناية أنا مقدرش أعرف مين سي أي ايه و مين مش عارف ايه لكن اللي أعرفه أنه منظمات و لوبيهات و ديبلوماسيين و سياسيين و طبعا اعلاميين بجميع أنواعهم مهتمين و بيتصلوا و بيعرضوا شغل و غيره، الهيصة دي أنا اخترت أشير ليها بالسي أي ايه مش لأن ده توصيف دقيق (مهواش بما أن فيه أطراف متناحرة بتتصل في نفس الوقت يعني ده نابع عن تكتلات سياسية/حزبية مش عن مؤسسة تمثل الدولة) بما أن السي أي ايه رمز أو أيقونة مش بمعنى جهاز الاستخبارات الأمريكي.
و على فكرة أنا مبتكلمش عن اهتمام بشخصي أنا بالذات أنا بتكلم عن اهتمام بأي صوت عربي هيقول حاجات معينة أو ممكن يقول حاجات معينة (و بما أن مش بس اليمين و المحافظين الجدد اللي مهتمين ممكن تلاقي أن الحاجات المعينة دي أنت معندكش أي مشكلة فيها).
دي حاجات شغالة في نفس السياق بتاع مثلا فضيحة اللنكولن جروب اللي كانت بترشي صحافيين في العراق عشان ينشروا مقالات معينة و طبعا مش بيدوروا على مدونين فقط بيدوروا على أصوزات من أي حتة و أي مجال التدوين بس له سوكسيه جامد جدا اليومين دول لأنه فيع تكنولوجيا و يمكن ادعاء أن دي أصوات بتعبر عن رجل الشارع و مستقلة جدا و بالتالي صادقة ده غير أن العثور عليهم أسهل بكثير (حضرتك الباشا هورويتز الله يخرب بيت أمه مثلا قضاله شهر بينظر للتدخل العسكري الأمريكي بناء على قرائة مدونتين و مجمع) و طبعا بما أن فيه جيوش مدونين أمريكان هايفيين و فاضيين و مقتنعين أنهم بيحاربوا بالمدونات و بيعيدوا صياغة العالم بالمدونات و وصل تأثيرهم لدرجة رفد مديرين مؤسسات صحفية كبيرة و غيره و دول ما هيصدقوا يشاركوا في اللعبة الجميلة دي و بالتالي يخلقوا هيلمان للصوت اللي اختاره اللوبي الفلاني أو الديبلوماسي العلاني.
هتلاقي النقاش معايا أسهل بكثير لما تبطل تعمل تحليل نفسي و تركز في الكلام اللي بيتقال و بس.
كل ده لا يعني أن التدوين في خطر أو أننا مستهدفين أو أي حاجة من الكلام ده، و خد بالك أني مقلتش أصلا أن الهيصة اللي أنا بوصفها دي سلبية ولا حتى اعترضت عليها كل اللي بقوله أن الجزيرة طرف في وسط طابور طويل بيعمل حاجات مشابهة (و الأمريكان مش الطرف الوحيد اللي في الطابور غير الجزيرة عندك حكومات عربية كمان).
بقيت كلامي كان دفاع عن الاهتمام بفكرة الصحافة الشعبية و أنه مش هبل مطلق الاهتمام بيها من دلوقتي حتى لو كانت باينة أنها حاجة بسيطة في سياقنا المحلي.